Skip to main content

ख्वै मेरो यौनिक अधिकार ?

तस्बीर श्रोतः एफोरिक ब्लगस्पट डट फि

हेलसिन्की सेन्ट्रल स्टेशनमा यात्रुहरुको राम्रै भिडभाड हुन्छ । र, प्रत्येक पटक म त्यहाँ पुग्दाँ विभिन्न दृश्यपरिदृश्यहरु देखेकै हुन्छु । जस्तो माग्नेहरुले बटुवाहरुबाट पैसा फुत्काउन प्रस्तुत गर्ने सृजनशीलता, एक्ला बृद्धबृद्धाहरु, तरुनी तन्नेरीहरु र हतार हतार हिडिरहेका मान्छेहरुको भीड । तर आज सयौं मान्छेहरुका बीच एउटा जोडी देखेँ, जो लिपिक्कै टाँसिएर दश मिनेटभन्दा बढी समय चुम्बनक्रिडामा ब्यस्त रह्यो । यी दृश्यहरु देखिरहँदा मलाई खासै अचम्म त लाग्दैन सायद बानी परिसकेको भएर पनि होला तर कताकता असहजताको अनुभूति चाँहि हुन्छ । सोच्दछु, कि सार्वजनिक स्थानमा जहाँ सयौं मान्छेहरु ओहोरदोहोर गर्दछन् त्यहाँ कम्तिमा पनि यतिधेरै स्वतन्त्रताको हक नदिएको भए पनि हुने परन्तु युरोप हो – यहाँ एउटा नागरिक अरु नागरिकहरुको अधिकार हनन् नहुनेहदसम्मका लागि आफ्नो स्वतन्त्रताको हक उपभोग गर्न स्वतन्त्र छ । र, यहि समय म मेरो देशको नागरिक भएको नाताले उपभोग गर्न पाउने अधिकार र यस विकसित देशका नागरिहरुलाई प्रदत्त गरिएका अधिकारहरुका बीच अनायाश तुलना गर्न पुग्दछु । बोध हुन्छ यस्तो पनि कि नागरिक भएर खास स्वतन्त्रताको अधिकार प्रयोग गर्न पाएको छैन मैले । त्यस्तै अरु आम नेपालीहरुले !
चुम्बन क्रिडामा मस्त त्यो जोडीलाई देखिरहँदा मैले केहि दिन पहिले एउटा तथाकथित सन्तुलित र उत्कृष्ट समाचार सामाग्री प्रशारण गर्ने एउटा टि.भी.को रिपोर्ट हेरेको याद गरेँ । रिपोर्टमा एउटा टि.भी. प्रस्तोता प्रहरीको एक झुण्ड सहित केहि गेष्टहाउसहरुका कोठाकोठामा छापा हान्दै थियो । रिपोर्टमा भनिदै थियो – प्रहरीको छापाबाट डराएर युवती बाथरुमभित्रबाट चुकुल लगाएर बसेकी छिन र उनका प्रेमी उनलाई बाहिर आउन आग्रह गरिरहेछन् ।  लगत्तै क्यामेराको फोकस बिछ्यौनामाथि पारियो र रिपोर्टमा भनियो – यो बेडको बिग्रिएको दृश्य र खोलिएको कन्डमको बट्टा देखेर नै हामी स्पष्ट हुन सक्छौ कि यहाँ अनैतिक कृयाकलाप भएको थियो । मलाई दया जाग्यो रिपोर्टरको शब्द चयन देखेर, त्यो प्रेमी र प्रेमीकाबिचको आपसी समझदारीमा भएको यौन कार्यालाप कसरी अनैतिक भयो ? के उसोभए हरेक विवाहित जोडीबिच हुने यौनकार्य मात्र नैतिक हो ? कि यौनकार्यका लागि विवाह मात्रै अन्तिम अनि एकमात्र नैतिक विकल्प हो ? कुनैपनि दुई वयस्क ब्यक्तिहरु आपसी समझदारीमा कसैलाई पनि अवरोध नहुने गरी यौन सम्बन्ध कायम गर्नु गैर्हकानुनी कार्य हो ? यस्तो चटक संसारको अरु कुन कुनामा छ ? 
कहिलेकाही समाचारका शिर्षकहरु देख्दा पनि बडो उदेक लागेर आउँछ । यस्तै एउटा उदेकलाग्दो समाचार शिर्षक पढेको थिएँ एकदिन, लेखिएको थियो – राजमार्ग छेउछाउका बनजंगलमा उच्छृङ्खल क्रियाकलाप बढ्दो ! एउटा पत्रकार प्रहरीसँग मिलेर गेस्टहाउसमा छापा मार्न जान्छ अनि ‘अनैतिक कृयाकलापमा संलग्न’ युवायुवतीहरुको कथा देखाउँछ र अर्को पत्रकार फेरि वनजंगलतिर घुम्छ र समाचारमा असन्तुष्टी पोख्छ – सार्वजनिक स्थलमा बढ्दो ‘उच्छृङखल गतिविधी नियन्त्रण’ गर्नका लागि पुलिसप्रशासनको ध्यान पुगेन ! अनि म चाँहि विलखबन्दमा पर्छु यी समाचारहरु पढेर – अब गेष्टहाउसमा छापा मारेपछि वनजंगल नगएर कहाँ जानु त ? 
अव युवाहरु जाग्ने बेला भएको छ आफ्नो अधिकारका लागि । मध्य युगिन परिपाटीमा चल्न खोजिरहेको राज्यसत्तालाई सचेत गराउने बेला भएको छ अब । दश बार्‍ह वर्षका चिचिला नानीबाबुहरुको बिबाह रोक्न नसक्ने सरकारले दुई वयस्कहरुको आपसी समझदारीमा हुने यौनसम्बन्धलाई निषेध गर्ने नैतिक बल छैन । युवाहरुले खबरदारी गर्नु जरुरी छ – रोक्ने बालबिबाह हो, न कि बालिगहरुले आपसी समझदारीमा कायम गर्ने सम्बन्ध !
हेलसिन्की, फिनल्याण्ड
1 comment

Popular posts from this blog

नेताको छोरा १ - समाज, विकास र चुनाव

(यो बि.सं. २०७४ मा नयाँ संविधानको कार्यान्वयनको कठीन खुडकिलो मानिएको तीन तहको निर्वाचन सम्पन्न गरेर समृद्द नेपालको सपना साकार पार्ने लक्ष्यमा अगाडि बढेको जिकिर गरिएको हाम्नो सुन्दर हिमाली राज्य नेपालको चुनावमा म स्वंय प्रतक्ष्य सहभागी भएर अनुभूत गरेका अनुभवहरूको श्रृङ्खला हो । जसलाई मैले नेताको छोरा नाम दिएको छु । यस श्रृङ्खलामा म चुनावका अँध्यारा र उज्याला पक्षहरूलाई अधिकतम इमान्दारीताका साथ प्रस्तुत गर्नेछु ।)
“यहाँ के छैन?” रेलगाडीभित्रबाट बाहिर चियाउँदै मैले आफैलाई प्रश्न गर्ने गर्दछु । शिशाबाहिर चिल्ला सडकहरु देखिन्छन । सफा पानी पोखरीहरु देखिन्छन । अनि देखिन्छन्, ससाना नानीबाबुहरुको किताबमा कोरिएका चित्रहरुमा जस्तै आँखाभरी बस्ने खेल मैदान, बगैंचा र घरहरु पनि । बिगत ५ बर्षदेखि म काममा जाँदै गर्दा या बिद्यालय जाँदै गर्दा अनि कहिलेकाही साथीभाईहरु भेट्न जाँदा उहि बाटो त्यहि नामको रेलगाडीे चढेर मैले गर्ने रेलयात्रा तीनै ५ वटा बिसौनी पार गरेर १५ मिनेटमा अन्तिम बिसौनीमा पुगेर रोकिन्छ तर मेरा मनभरी उब्जने तर्कनाहरु रेलगाडीसँगै रोकिदैनन् । ती अझै बढ्दै जान्छन । 
सडकमा मान्छेहरु हतारिदै आ…

नेताको छोरा २ - टिकट, उत्साह र यात्रा

(यो बि.सं. २०७४ मा नयाँ संविधानको कार्यान्वयनको कठीन खुडकिलो मानिएको तीन तहको निर्वाचन सम्पन्न गरेर समृद्द नेपालको सपना साकार पार्ने लक्ष्यमा अगाडि बढेको जिकिर गरिएको हाम्नो सुन्दर हिमाली राज्य नेपालको चुनावमा म स्वंय प्रतक्ष्य सहभागी भएर अनुभूत गरेका अनुभवहरूको श्रृङ्खला हो । जसलाई मैले नेताको छोरा नाम दिएको छु । यस श्रृङ्खलामा म चुनावका अँध्यारा र उज्याला पक्षहरूलाई अधिकतम इमान्दारीताका साथ प्रस्तुत गर्नेछु ।)"दाई, बधाई छ । अंकलको टिकट भएजस्तो छ ।" एकजना गाउँले भाईले फेसबुक म्यासेन्जरमा खबर गरेको रहिछन् । मैले आश्चर्यतापूर्वक उनलाई प्रतिप्रश्न गरेँ – "को अंकल ?" मेरो प्रश्नले ती भाई झन छक्क परे । भने, "को अंकल हुनु ? हजुरको बाबा के!" "कहाँ अंकल भन्या त ? तिमीले मेरो बाबालाई पुसाजु भन्नुपर्छ ।" मैले उनलाई हाम्रो नाता सम्झाउनु आफ्नो कर्तव्य ठानेँ । फेरि चुनावको पारो ह्वात्तै बढ्दै थियो । बाबाले टिकट पाएको अपुष्ट समाचार जसले सुनाएको छ, प्रचार उही ब्यक्तिबाट थाल्नु पनि चुनावी रणनीतिको एउटा पाटो त छँदै थियो ।
यसरी, एउटा गाउँले भाईबाट बाले संसदीय निर…

डा. केसी, उनको अनशन अनि एउटा झुम्रे नागरिक

डा. गोविन्द केसीका शुरूवात तिरका अनशनहरूमा मेरो पूर्ण समर्थन थियो । मैले पनि आफ्ना सामाजिक संजालका भित्ताहरूमा निकै खरा खरा वाक्यहरूसहित तीनका पुछारमा ह्यासट्याग आइएमवीथडाकेसी लेखेकै हुँ । मलाई लुकाउनुपर्ने केहि छैन । डा. केसीका शुरूवाती मागहरू भनेका चिकित्सा क्षेत्रमा बढ्दो राजनैतिक हस्तक्षेप अनि तीसँगै यस क्षेत्रमा बढ्दै गएका विकृती विसंगतीहरूको अन्त्य हुनुपर्छ भन्नेमा केन्द्रित हुन्थे ।तर डा. केसी जति नै निष्ठावान, त्यागी या देवरूप नै किन नहोस उनको, उनका काँधमा बन्दुक राखेर आफ्ना विभिन्न खालका अभिष्ट पूरा गर्न खोज्नेहरूको एउटा ठूलो जमातबाट उनी घेरिएका छन । यो मिथ्याको आरोप हैन । निसन्देहः डा. केसी अनशन बस्नुपूर्व उनले अनशन बस्न थालिसकेपछि स्वास्थ्य क्षेत्रमा महशुस हुनेगरी परिवर्तन भएकै हुन । त्यसको जस पूरापूर उहाँलाई जान्छ । तर यसको अर्थ यो हैन कि स्वास्थ्य क्षेत्र सुधारका लागि सबै कुरा वहाँले नै भनेजसरी हुनुपर्छ । बिडम्बना यो छ कि वहाँको शुरूको अनशन देखि नै माग पूरा गर्ने बहानामा सरकारले एउटा बेथितीको पृष्ठपोषण गर्ने कामको श्रीगणेश गरेको छ । केसीको एक सुत्रिय माग थियो बरिष्ठताका आ…