सुरभित तिमी


म अकिञ्चन*
म नादान*
असमर्थ छु म
सुन्दरताको तिम्रो
गर्नलाई बख्यान ।

ख्वै ढाँटेर वा साँच्चिकै
पौडिदै नयनहरुमा
आफ्ना प्रियतमाका
भन्छन् प्रेमीहरु,
अहाँ ! कति सुन्दर ?
नयन प्रियसीका मेरा !
अरुलाई जस्तो लागोस् परन्तु,
तर मलाई लाग्छ तिम्रा दुई चक्षुहरु
ती हुन मरभुमीका एक जोर रोहोटाहरु*
जो छन उस्तै सुप्रदिप्त
जसमा पाउँदछु म प्रेमका अगाध – छालहरू !

हुन्छन् कहाँ सुन्दर ती
कस्मेटिक नागरीहरू*
जो दुर्गन्ध छरिहरहेछन्
हर साँझ – सुन्दरताको !
सुँघ्छु जब म सुरभित* तिमीलाई
लाग्छ फिक्का ती मलाई
प्रशोधित वासनाहरु
कस्मेटिक नागरीहरु !

तिमी शैवाल* झैं सदावहार छ्यौ
तिमी सतिसाल झैं अटल छ्यौ
हो, तिमी अतुलनीय छ्यौ ।

तिम्रो सूक्ति*
तिम्रो सुषमा*
पाइँदैनन् ती खोजेरपनि रत्ति,
कस्मेटिक नागरीहरुमा
किनभने तिमी झैं छैनन तिनीहरू साँच्चि
थाहा छ ?
तिमी प्राकृतिक हौ, उनीहरु निर्मित हुन ।

कृत्रिम झलमलीमा अलमल्ल म,
म अकिञ्चन,
म नादान
त्यसैले छु असमर्थ
सुन्दरताको तिम्रो
गर्नलाई बख्यान ।

*शब्दार्थः
सुरभित – सुगन्धित, सुवासित
रोहोटो – पानी जमेको सानो खाल्टो
सुषमा – परमशोभा
सूक्ति – मधुरवचन
शैवाल – पानी जमेका ठाउँमा पलाउने हरियो रङको झ्याउ
नागरी – सहरमा बसोबास गर्ने स्त्री, सहरिया स्त्री
नादान – उमेर वा अवस्था नपुगेको
अकिञ्चन – धनविहीन, दरिद्र

Comments

Unknown said…
तिमी शैवाल* झैं सदावहार छ्यौ
तिमी सतिसाल झैं अटल छ्यौ
हो, तिमी अतुलनीय छ्यौ ।

गजबले शब्द चयन् गर्नु भएको रहेछ । हजुर का हरेक लेखमा खोज्यो भने अनेक चिज भेटाउन सकिन्छ मात्रा खोज्न सक्नु पर्‍यो शायद निराजन त्यसैले निराजन बन्न सफल छ् । माया आँफैमा सुन्दर छ जती शब्दले बर्णन गर्न खोज्यो त्यती त्यस्को आवश्यकता बढ्दै जान्छ र मायालु हरपल सुन्दर, सुगन्धित, मिठास, नयन भित्रै राखेर हिडौ हिडौ हुने आखिर मायामै जिबन छ त मायालुमै जिबित मेरो बुझाई यही हो हुन त हजुर ले भने झै हरेक बुझाई अन्तिम सत्य नहुन पनि सक्छन ।

हजुर को कलम मा बग्ने मासिको रङ मा तागत छ्, श्रीजना छ् आशा गर्छु यो कलम को गती थोरै अझै बढोस् हामीलाई यस्तै मिठा मिठा रचना हरुले स्वागत गाह्रोस यो सापेक्ष बुझाई मा । शुभकामना तथा धन्यवाद निराजन जि ...
HelMandu said…
प्रदिपजी, आफ्नो ब्यस्त समयका बाबजुद पनि मेरो आग्रहलार्इ सहर्ष स्वीकार गरी सृजना अध्ययनगरी यति मीठो टिप्पणी लेखिदिनुभएकोमा म यहाँप्रति अत्यन्तै कृतज्ञ छु । यहाँको माया सदैव रहिरहोस्, अझ सुधार गर्नुपर्ने पक्षहरूका बारेमा लेखिदिनुभयो भने म साँच्चीकै आभारी हुने थिएँ ।
HelMandu said…
शान्ति गुरू, यहाँको सुझावको लागि हार्दिक आभार प्रकट गर्दछु । शब्दकोषमा भएका गहन अर्थ राख्ने शब्दहरूको खोजी शुरूवात गरेको छु ।

Popular posts from this blog

क्लोरिनको झोल, वैज्ञानिकहरू र मेरी बोइकी मुड्की

नांगो नाच, यौनधन्दा र राजधानी

एउटा सग्लो रात(कथा)