अमान्छे

तिमी
आफू ठीक र अरू बेठीक
तिमी जान्ने अनि बाँकी नजान्ने
मात्र तिमी असल र अरू सबै खराब
भन्दैनौ र गर्दैनौ,
त्यसैले तिमी नयाँ प्राणी हौ
हो, तिमी अमान्छे !

यदि तिमी विश्वस्त हुँदैनौ,
चाकडी, चाप्लुसी र चम्चागिरीमा
जबसम्म तिमीलाई लागिरहन्छ,
सत्य, सत्य नै हो,
असत्य, सधैं झुटो नै हुन्छ
अब मलाई सन्देह लाग्दैन
तिमीलाई भन्नलाई – ए अमान्छे !

जतिखेर तिमीलाई लाग्दैन
तिमी बोल्यौ\बोलेनौ
अरूलाई पोल्यौ\पोलेनौ,
वा, त्यो पीडामा डुबिरहँदा
तिमीले खित्का छोड्न जानेनौ,
अब त साँच्चिकै प्रमाणित भयौ,
तिमी संसारकै एकमात्र  – अमान्छे !